Hiaz is der rauhe Winter då

Hiaz is der rauhe Winter då, den sicht ma um und um,
in Bergn sengt der Reimfrost her, in Gråbn, då scheint ka Sunn.
Ma hört ka Vogerl pfeifn, ma siacht ka Blattl Klee,
ka Brentlglocken läutn, ka Gamserl auf der Höh.

Mei, wås soll dås bedeutn, dåß s' heut um Mitternåcht
mit der Sturmglockn läutn, håt a Engl a Botschåft bråcht.
Messias soll geboren sein, kommt aus dem Paradeis,
sei Muatter soll a Jungfrau sein, dös war amål wås Neus.

Viel Glück, meine Hirtn, seids munter und wåcht,
ihr derfts enk net fürchtn, wånn 's glei is Mitternåcht.
Ihr håbts jå vernommen die englische Stimm,
stehts auf und gehts eilends nåch Bethlehem hin.

Bua Riapl, steh fein lifti auf und nimm an lången Såck
und fåß ihn voll von Federn ån, daß 's Kind an Polster håt;
dås Hascherl möcht derfriasn, liegt auf dem sauern Heu,
ka Gwanderl und ka Wiagerl, dås is a Bettlerei.

Bua Hansl, måch di nur gschwind auf und nimm dein Hirtenståb
und suach dir gschwind zwoa Lamperl aus, dåß du an Opfer håst;
a Loaberl Kas und Butter, dazua a Gerstnbrot,
dås måg dås Kind net beißn, weil 's koane Zahnderl håt.

Und wånn i amål sollt reicher werdn, åft werd i wieder kemm,
åft werd i dir a Ganserl bring, is besser wiar a Henn.
O Jesu, liebster Jesu mein, veråcht nicht meine Gåb!
I hätt dir gern wås Bessers bråcht, du woaßt, dåß i nix håb.